#NaBiciContraCovid19
ConBici é a Coordiandora de Organizacións ciclistas do Estado español que agrupa a máis de 60 asociacións locais repartidas por toda a xeografía.
Con ocasión da alerta sanitaria derivada da pandemia da COVID-19 e ante un clima social e mediático de criminalización da bicicleta, viuse na obriga de facer pública a súa postura sobre o uso lexítimo deste medio de transporte, que se concreta nos seguintes puntos:
Con carácter previo, débese favorecer o uso da bicicleta, ao entender que constitúe dende sempre unha alternativa moi valiosa para a mobilidade cotiá, e especialmente nos momento que nos toca vivir.
Débese proceder á reapertura dos servizos de bicicleta pública, que constitúen unha alternativa excelente ao transporte público e privado motorizado. Deste xeito, liberaríase espazo nos transportes colectivos para que outras persoas para os que resulten fundamentais poidan gardar as distancias de seguridade recomendadas polas autoridades sanitarias.
Débense crear corredores ciclistas detraéndoos do espazo desproporcionadamente adicado ao tráfico motorizado, para favorecer os desprazamentos masivos e seguros que a bicicleta facilita, ampliando de xeito significativo os espazos de mobilidade ciclista e peonil. A mobilidade en bicicleta facilita unha ocupación moito menor do espazo das rúas para a mobilidade individual que facéndoo en vehículos a motor, á vez que resulta eficiente e non produce emisións de gases contaminantes.
É necesaria a redución de velocidades cara as cidades 30, garantindo así o acougado do tráfico e a seguridade viaria e evitando comportamentos temerarios. A redución de velocidades non debe descansar só na instalación de sinalización, senón que serán necesarias modificacións provisionais ou definitivas do viario e sistemas de control efectivos.
Deberá acordarse a apertura dos servizos de mantemento e reparacións de urxencia de bicicletas a demanda para profesionais e actividades autorizadas, do mesmo xeito que se considerou para vehículos a motor, mentres dure o estado de alarma.
Considérase imprescindible o recoñecemento da bicicleta como medio de transporte por parte dos membros e forzas de seguridade do Estado. Estes deberán ser instruidos sobre o feito de que as normas limitativas de mobilidade persoal derivadas do estado de alarma decretado se refiren a actividade e non a medios de transporte, polo que os prexuizos desgraciadamente existentes en amplas capas da sociedade e nas referidas forzas deberán ser combatidos mediante a información, formación e difusión do coñecemento.
Os intervalos semafóricos han de ser modificados, para proporcionar e devolver a prioridade a peóns e ciclistas, reducindo os tempos de espera para que a distancia de seguridade poida ser respetada, evitando as aglomeracións de espera nos semáforos para estes colectivos. Todos os semáforos de pulsador para peóns deben ser desactivados, pois presionar os pulsadores cos dedos pode ser en si mesma unha vía de transmisión do virus.
É inescusable o respecto absoluto aos espazos peonís e ciclistas, reprimindo condutas de aparcamento indebido de vehículos de motor invadindo ditos espazos, e deberán establecerse itinerarios verdes, reservados á mobilidade activa peonil e ciclista e limitados a calquera vehículo motorizado, ou compartidos con prioridade para a mobilidade activa en espazos que non permitan os espazos segregados.
Débese promover a instalación xeralizada de aparcamentos para bicicletas en centros sanitarios e outros polos atractores da mobilidade para facilitar a súa utilización segura. Ditos aparcamentos deberán cumprir os estándares de seguridade establecidos, descartándose aqueles que non os proporcionen.
